اسمعوا حكايتي و احكمو

السلام عليكم حبيت نحكيلكم مشكل صرالي فالخدمة ليومين لي فاتو انايا موظفة في البلدية كمحاسب رئيسي و عندنا عون أمن الله لا يوجهلو الخير معروف عنو سمعتو السئية و طردوه قبل من ادرات  بسبب مشاكل كان يديرها و بدلوه للبلدية تاعنا وهو كبير و عندو شهادة جامعية و نهار كامل و هو يحسب في روحو على الموظفين و يبريزوني في روحو بلي يعرف يحكي انجليش و مكاش حاجة ميدخلش روحو فيها لدرجة انو تجي موظفة نازلة فالدروج دايرة يديها فالجيب يقولها علاش دايرة يديك فالجيب و ماخفي اعظم و يدخل لمكتب الامين العام و يصول فيه كيما يحب تقول تاعو و المير منهدروش ضعيف شخصية كيما يقولو يدير و قضى مصالح للامين العام .و نص الموظفين شكاو منو و زميلي فالمكتب و زميلة اخرى و بزاف موظفين ميحكوش معاه و انا وحدة منهم نكرهو من قبل على خاطر حاسب روحو بزاف بزاف و حاب يتمسأل علينا و يذلنا بأي طريقة سيرتو سيرتو لي ناس ملاح و خاطيهم و زعمة لي حاسب روحو يقدر عليهم كيما انا وكيما قتلكم هو عون امن و كي تجيب اي موظفة ولدها و لا بنتها يقولها ممنوع مزيديش  تجيبيه و هوما يجيبوهالو بضحكة و يجيبو المرة الجاية انا كنت ندي من قبل بنت اختي تقرا فالمسجد و كي متجيش المعلمة نجيبها للبلدية تقعد معايا حتى 12 مرات وديما يجي يقولي هدي شكون و علاه جبتيها ممنوع الاطفال انا منهدرش معاه  و مرة قالي هدي آخر مرة تجيبيها مهدرتش معاه و قلت في قلبي زكارة فيك برك نجيبها ايه و لول البارح ولد اختي حب يجي معايا جبتو كان قاعد مورا البيرو تاعي و يكتب و انا حداه و نخدم في خدمتي جا هدا المخلوق فايت سمع هدرة تاع طفل جا للبيرو تاعي قالي شكون هدا قتلو ولد ختي بتشناف قالي علاه جبيتيه قتلو ومبعد قالي ياك علابالك ممنوع الاطفال قتلو مش ممنوع قتلو انا منتلقاش الاوامر منك كي يقولي االمير و لا الامين العام متجيبيش منجيبش( للعلم الموظفات هنا و شحال من وحدة تجيب ولادها واحد مهدر معاهم و قالهم متجيبوش غير هو برك يحب يوري روحو بلي مسؤول أمن و يدخل فالموظفين )قالي درك روح نهدر للأمين العام قتلو روح ايه راح كي الفحل كتب بيا تقرير (للعلم تقرير مداروش على جال طفل دارولي على خاطر انا منهدرش معاه و منقيموش حب يدلني باي طريقة)و سنياه الامين العام و سي الامين العام راح دارو فالدوسي تاعي بلا مايقولي و موراها جا للبيرو تاعي و شاف الطفل و ماقاليش علاش جبتيه قالي متنسايش على الخدمة الفلانية المهم زميلتي قاتلي راه دار بيك رابور و حطو فالدوسي تاعك جبدت قريتو و رديتو غدوة من داك مقدرتش نحمل الظلم و القهر حكيت لزميلي فالمكتب و هو واحد مجنون و ميحبش الحقرة قالي وش كتبلك فالرابور قتلو اسنى نجيبو رحت جبتو من مكتب المستخدمين كانو فيه بنات تاع لانام و مقلتلهمش على الحكاية انا على اساس نمدو لزميلي يقراه و نردو للدوسي و نروح نحكي مع الأمين العام نفهمو لي يحطلي راpور من ورا ظهري و يجي يقولي اخدميلي الخدمة الفلانية زميلي حكم الراpور و قالي تبعيني قتلو وين قالي هيا برك قتلو وشبيك اني ندير بروبلام للبنات تاع المستخدمين قالي لالا ارواحي دخلنا عند الامين العام خبطلو الرابور على الطابلة قالو كيفاش تخلي واحد كيما هداك يديرلها تقرير و تحطولها فالدوسي و لا يمهمه و يقولو ياك ممنوع يجيبو الاطفال قتلو مش غير انا جبت كامل جابو و مدارلهمش المهم لي معايا شبع فيه و خرج و انا كملت معاه ةو دافعت على روحي و هو كي خرج زميلي لي خاف منو و لى يعيط و يهز في صوتو قتلو غير حبس و خرجت و مبعد راح للمستخدمين قال للطفلة كيفاش تمدولها دوسي قاتلو جبدتو وحدها كي سمعتو رحت ليه قتلو ايه من حقي نعرف وش كاين فالدوسي تاعي كيفاش تكحلولي و انا لا خبر قالي مش من حقك المهم لعشية زدت شكيت للمير هو يعني كي نشكي كي مانشكيش هو بداتو غالبهم المهم بردت قلبي صباح زاد جا المير للبيرو تاعي و يحكمو زميلي رخسو بيه بالامين العام و مالقاو مايقولو على خاطر عندي حق و نسيت ماقلتلكمش هدا المخلوق الله لايفرجيه الخير يلم اولاد الموظفات و يقريهم فالبيرو تاعو لي فيه كاميرات مراقبة زعمة لوجه الله صار هو حلال عليه يجيب لولاد و انا حرام عليا قولولي ادا انا غالطة و ادا انتم عندكم هكدا عون امن يرخس الموظف و المسؤولين يوقفو معاه (و نزيدكم هو مسؤول زعمة على امن الموظف و المسؤول مالا كي يجي كش واحد يتقابض مع اي موظفة و الله يهرب و منلقاوهش و كي يخلاص الهول يجي يحل على فمو نهار كامل و هو يكتب فالتقارير للحراس و يعس لولاد لي يجو البلدية لي مش خدمتو و كي يعود الامر متعلق بخدمتو يهرب

قرأت ما خطت يداك بتمعن كبير لعلي أساعدك في مشكلتك فاستوقفتني هذه الكلمة فهل من إيضاح لإزالة الغشاوة ؟
يبريزوني 

قرات يااختي و انا لا اعرفك انا اعمل بالمستشفي عملت تشغيل شباب ثم 05 ,ساعات ثم متعاقد ثم ملحق ادراة ثم ملحق ادارة رءيسي ثم متصرف فترة تقريبا 13 _عشرة سنة لا الاه الى الله امة و شعب لا يوصف فيهم الطيب و السيء و لكن ما انصحك به نصيحة كما افعل انا فترة عملك ، 8 ساعات اعمليها اطليعي على القانون الاطفال ممنوع لا تحظريهم و لا تعطي الفرصة لاحد كي ايهينك لا تفتحي مجال العمل و بيتك لا تدخلي لا جدال ، انا لا اعطيه الحق لانه يوجد الكثير منه و لكن اريد حمايتك و هو ربي يخلصه نحن كذلك غيابات موظفين و لكن لا يحاسبون يتخدو ا انا لااحاسبهم الله وحد يحاسب ،مااريد قوله اتقني عملك و تحدثي في حدود عمل و اعلمي الممنوع من المسموح اتمنى ان اكون هونت عليك بهذه الكلمات سلام